Prezidentin təltif etdiyi Aynur Sabitova kimdir... - DOSYE
Prezident İlham Əliyev Ədliyyə orqanlarında səmərəli fəaliyyətinə görə bir qrup şəxsi “Dövlət qulluğunda fərqlənməyə görə” medalı ilə təltif edib.
Təltif olunanlar arasında Ədliyyə Nazirliyi İnsan Hüquqları və Kommunikasiya idarəsinin rəisi, ədliyyə müşaviri Aynur Sabitova da var.
Qeyd edək ki, Aynur Sabitova Ədliyyə Nazirliyinin mətbuatla əlaqələrini də kurasiya edir.
Aynur Sabitova həm də Azərbaycan Dillər Universitetində çalışırr.
Aynur Zakir qızı Sabitova 28 may 1975-ci ildə Bakı şəhərində ziyalı ailəsində anadan olub. 1992-ci ildə Bakı şəhəri 53 saylı orta məktəbi qızıl medalla bitirdikdən sonra Azərbaycan Dövlət Dillər İnstitutunun ingilis-alman dilləri fakültəsinə qəbul olunub. 1997-ci ildə institutu fərqlənmə diplomu ilə başa vurub.
A.Sabitova 1997-ci ildən Dillər İnstitutunun İngilis dilinin tərcüməsi kafedrasında müəllim vəzifəsində əmək fəaliyyətinə başlayıb.
2003-cü ildə “Harriet Biçer Stounun əsərlərində Amerikanın sosial ziddiyyətləri” adlı namizədlik dissertasiyası müdafiə edib və 2004-cü ildən İngilis dilinin tərcüməsi kafedrasında dosent vəzifəsində çalışıb.
2006-cı ildə ona Prezident yanında Ali Attestasiya Komissiyası tərəfindən dosent elmi adı verilib.
2005-ci ildə A.Sabitova Bakı Dövlət Universitetinin Hüquq fakültəsinə qəbul olunub və 2009-cu ildə hüquqşünas ixtisasını bitirərək ikinci ali təhsilə yiyələnib.
Pedaqoji fəaliyyətlə yanaşı, 2011-ci ildən etibarən Bakı Hüquq Mərkəzində hüquq məsləhətçisi vəzifəsində çalışıb.
2012-ci ildə “Amerika və Azərbaycan ədəbiyyatlarında romantizm cərəyanı: tipologiyası, tarixi” mövzusunda doktorluq dissertasiyası müdafiə edib.
2012-ci ildə Ədliyyə qulluğuna qəbul olunub. O, ədliyyə nazirinin əmri ilə Səadət Sarayının (Bakı nikah evi) aparıcı məsləhətçisi vəzifəsinə təyin edilib.
2013-cü ilin noyabr ayından Səadət Sarayında müdir müavini vəzifəsində çalışıb.
2014-cü ildə A.Sabitova Prezident yanında Ali Attestasiya Komissiyası tərəfindən filologiya üzrə elmlər doktoru elmi dərəcəsinə layiq görülüb. ADU-nun 06 iyul 2015-ci il tarixli Elmi şurasının qərarı ilə Xarici ölkələr ədəbiyyatı kafedrasının professoru vəzifəsinə seçilib.
Filologiya elmləri doktoru, professor Aynur Sabitova hazırda ADU-nun Xarici ölkələr ədəbiyyatı kafedrasının müdiridirr.
A.Sabitova elmi-pedaqoji fəaliyyəti ərzində dünya ədəbiyyatından poeziya, nəsr seçmələrini Azərbaycan dilinə tərcümə edib. Həmin tərcümələr “Xəzər”, “Azərbaycan” kimi jurnallsrda və dövrü mətbuatda dərc olunub. Onun tərcümələri Nazirlər Kabineti yanında Tərcümə Mərkəzi tərəfindən kitab şəklində çap olunub.
Aynur Sabitova bir sıra elmi məqalə, monoqrafiya, metodik və dərs vəsaitlərinin müəllifidir.
Ailəlidir, üç övladı var.
Aynur Sabitova tanınmış şair-tərcüməçi Zakir Fəxrinin qızıdır.
